Жергілікті алкалоид веб-сайтына кіріңіз

Живко Мукаетов (Zhivko Mukaetov)

"Алкалоид АД" (Alkaloid AD)басқармасының бас директоры/Президенті

2024 жылы фармацевтикалық сала макроэкономикалық тұрақсыздықтың әсерінен маңызды қиындықтарға тап болды, оның ішінде инфляциялық қысым, өндірістік және логистикалық шығындардың өсуі, сондай-ақ валюта курстарының ауытқуы болды. Геосаяси шиеленіс пен нормативтік реттеудің күрделілігі себебінен жеткізу тізбектеріндегі бұзылулар шикізатпен уақытылы қамтамасыз етуді қиындатты. Осы уақытта цифрлық трансформацияның жылдам қарқыны және жаңа технологиялардың енгізілуі бизнес-процестерді қайта құруды, персоналды тұрақты оқытуды және киберқауіпсіздікті күшейтуді талап етті. Нарықтағы қатал бәсекелестік, әсіресе генериктер өндірушілері тарапынан, сондай-ақ ғылыми-зерттеу және әзірлеулер саласында инновацияларға деген өсіп келе жатқан қажеттілік операциялық талаптарды одан әрі арттырып, тиімділік, бейімделгіштік және ұзақ мерзімді стратегиялық жоспарлаудың маңыздылығын көрсетті.

НӘТИЖЕЛЕР

Барлық қиындықтарға қарамастан, Alkaloid компаниясы күнделікті қызметінде оң қаржылық нәтижелерге қол жеткізіп, жоспарланған көрсеткіштерді асыра орындады:

Шоғарландырылған сатылымдардың жалпы көлемі 19 005 696 029 македондық денарды құрады, бұл 15%-ға өсу көрсеткішін білдіреді, ал шоғарландырылған таза пайда 1 684 020 094 македондық денарды құрап, 2023 жылмен салыстырғанда 7%-ға өсті.

Сатылымдардың 32%-ы ішкі нарықта, ал 68%-ы экспортқа сатылды, оның ішінде: 27% — Оңтүстік-Шығыс Еуропа нарықтарына (SEE), 22% — Батыс Еуропа нарықтарына, 18% — Шығыс Еуропа нарықтарына, 1% — басқа нарықтарға.

2023 жылмен салыстырғанда ең жоғары өсу қарқыны Кипр нарығында (980%), Литвада (233%), Ұлыбританияда (62%), Грузияда (57%), Украинада (48%), Португалияда (45%), Монғолияда (36%) және Германияда (26%) тіркелді. Сонымен қатар, Alkaloid KONS компаниясының өсуі 32% құрағанын атап өту керек.

Шоғарландырылған сатылымдардың 91%-ы фармацевтикалық сегментке, ал 9%-ы химия, косметика және өсімдік шикізаты сегментіне тиесілі.

ҚОР БИРЖАСЫНДАҒЫ ОПЕРАЦИЯЛАР

2024 жыл ішінде Alkaloid компаниясының акциялары қайтадан Македония қор биржасындағы ең көп саудаланатын және өтімді акциялардың қатарына кірді.

Alkaloid AD Skopje қор биржасындағы тұрақты операциялары аясында 1 412 572 306 македондық денар көлемінде сауда-саттықты қамтамасыз етті, бұл 2024 жылы Биржаның бірінші ресми нарығында тіркелген жалпы айналымның 19,19%-ын құрады. Alkaloid AD Skopje акцияларының бағасы 18 151 денардан 29 000 денарға дейін ауытқып, орташа бағасы 22 376,45 денарды құрады, бұл орташа нарықтық бағаның 2023 жылмен салыстырғанда 25,84%-ға өскенін білдіреді. Компанияның нарықтық капитализациясы 2024 жылдың соңында 40 435 722 250 македондық денарды құрады.

Македония қор биржасының (MSE) 2024 жылғы жылдық марапаттау рәсімінде Alkaloid AD Skopje төрт беделді марапатқа ие болды, бұл оның корпоративтік басқару, нарықтық адалдық және ESG көрсеткіштері саласындағы жетекші орнын тағы да растады және компанияның ашықтық, жауапкершілік және тұрақты даму саласындағы жоғары стандарттарын көрсетті. Компания былайша бағаланды: «Қор биржасында саудаланатын ең ашық акционерлік компания» — БАҚ және нарық қатысушыларының пікірінше, «Жыл акциясы» марапатын алды, аталған марапат Македония қор биржасы (MSE) мен Faktor порталы жүргізген қоғамдық дауыс беру негізінде берілді, сондай-ақ MSE және Солтүстік Македониядағы Америкалық сауда палатасы бірлесіп берген ESG саласындағы үздік тәжірибелерге байланысты марапатқа ие болды.

ИНВЕСТИЦИЯЛАР ЖӘНЕ ТҰРАҚТЫ ДАМУ

2024 жылы Alkaloid AD Skopje компаниясы өз қызметін жүзеге асыратын қоршаған орта мен қоғамдарға жауапкершілікпен қарауға бағытталған ESG стратегиясының маңызды бөлігін сәтті іске асырды. Бұл білім беру, спорт, мәдениет, жастарды дамыту, халықтың әлеуметтік әлсіз топтарын қолдау және қоғамда позитивті құндылықтарды ілгерілету салаларындағы көптеген қайырымдылық және әлеуметтік жауапты бастамалар арқылы жүзеге асырылды.

Жылдың ең маңызды оқиғаларының бірі — компания қызметкерлері, олардың отбасылары мен достары үшін ұйымдастырылған қайырымдылық шарасы болды. Іс-шара барысында шамамен 2 миллион динар жиналып, «SOS Балалар ауылы» ұйымына көмек ретінде бағытталды.

Солтүстік Македониядағы денсаулық сақтау және фармацевтика саласындағы болашақ білікті мамандарды сапалы біліммен қамтамасыз ету және даярлау мақсатында компания дуальды білім беру және тағылымдама бағдарламаларын іске асыруды жалғастырды, бұл бағдарламалар студенттер тарапынан өткен жылдармен салыстырғанда үлкен қызығушылық тудырды. «Трайче Мукаетов» қоры да өз бағдарламалық іс-шараларын тұрақты түрде жүзеге асыруды жалғастырды. Қордың 2007 жылдың мамыр айында құрылуынан бері 699 студентке стипендия берілді, ал стипендиялар мен біржолғы ақшалай ынталандыру арқылы компания Alkaloid AD Skopje екі профильді факультеттің үздік түлектеріне шамамен 141,7 миллион денар инвестициялады.

ПЕРСПЕКТИВАЛАР

2024 жылдың қыркүйек айында біз Alkaloid мұражайын ресми түрде аштық —  компанияның тарихынан алынған, көптеген ұрпақтардың күш-жігерімен құрылған маңызды сәттер мен жүрекке жақын естеліктерді бейнелейтін экспонаттардың жиынтығынан тұратын кеңістік. Бұл экспозициялар сәтті македондық тарихтың кезең-кезеңімен дамуын бейнелейді, ал жаңа ұрпақтар оны елден тыс жерлерде таратуда, себебі бүгінде Alkaloid өнімдері әлемнің 50-ден астам елінде ұсынылуда.

Қазіргі уақытта Alkaloid — 3 000-нан астам қызметкері, 6 000-ға жуық акционері және шамамен 2 000 отандық жеткізушісі бар компания. Көптеген мүдделі тараптар қиын кезеңдерде құрылған және адалдық, бүтіндік, үйлесімділік пен өзара құрметке негізделген жүйеге сенім артады.

Дәл осы себепті біз қазір және осы жерде қолымыздағыны бағалап, позитивті өзгерістер енгізуге ұмтылуымыз керек — бәрін өзімізден бастауымыз қажет., Біздің «Денсаулық бәрінен қымбат!»-деген  басты қағидатымызға сүйене отырып, жеке мысал адамдардың санасы мен жауапкершілігін арттыруға, тәртіпті, бірізді және адал еңбек етуге ықпал ете алады.